DOH-7 mosusi kun may “malpractice”

CEBU, Philippines - Niumol og komitiba ang Department of Health-7 nga moimbestigar kalabot sa masuso nga giingong nalubag ang liog atol sa pagpanganak diha sa Vicente Sotto Memorial Medical Center.

Matud ni Dr. Jaime Bernadas, Regional Director sa DOH-7 nga ang komitiba naporma niadto pang adlaw nga Lunes, buot nila nga mahatagan og katin-awan ang pamilyang Torreon sa gidangatan sa ilang kamaguwangang anak.

Dugang ni Bernadas, nga base sa inisyal nga pakisusi nasuta nga nasamad ang liog sa bata tungod sa cord coil ug ang kalisod sa pagpagawas kaniya. Apan padayon pang gisuta kun buhi o patay na kining daan sa tiyan sa inahan sa dihang gidala kini sa VSMMC niadtong Domingo.

Base sa referral slip gikan sa Eversley Child Sanitarium diin unang gidala ang inahan niadtong Sabado sa gabii, wa na sila makabatyag og pitik sa kasing-kasing sa masuso sa pagpa- ultrasound niini ug nasuta usab nga suhi ang posisyon sa bata nga giingong padung pa lang mag-unom ka buwan. Sa pagkakaron, si Bernadas nagdumili pagbutyag kung dunay nahitabong medical malpractice sa habig sa mga medical staff sa tambalanan. May pahimangno hinuon ang DOH ngadto sa mga mabdos nga gikinahanglan g’yud ang kanunay nga pagpakonsulta sa ilang kahimtang aron makaandam  ang mga doktor sa ilang pagpanganak. (BANAT NEWS)