Bag-ong pusher sikop dayon

CEBU, Philippines – Wala maglisud ang kapolisan sa pagsikop sa usa ka giingong level 3 drug pusher nga dayag kaayong namaligya og ginadiling drugas sa  barangay Ibo, dakbayan sa Toledo niadtong Lunes sa gabii. Ang hiniusang pwersa sa Provincial Intelligence Branch, Provincial Anti-Drugs Special Operation Task Group ug Provincial Investigation and Detection Management Branch misikop sa usa ka Ronel Coronado.

Ang hepe sa PIB sa Cebu Provincial Police Office, Supt. Rodolfo Albotra, nga nahinabi sa Banat News miingon nga dili pa matawag nga notadong drug pusher ang dinakpan gumikan kay bag-o lang kini nagsugod sa negosyo.

Matud ni Albotra nga moabot sa 100 gramos nga drugas ang mabaligya sa suspek matag semana gikan sa tighatud niini.

Nabasahan sa cellphone sa suspek ang mga mensahe gikan sa iyang mga kostumer nga andam na nga kuhaon ang mga epektos gikan niya. Nagtoo si Albotra nga kompiyansa lang kaayo ang suspek maong dali ra kaayong nasikop. -/GMR) (BANAT NEWS)