Engineer nagpusil sa iyang ulo

CEBU, Philippines – Dead on the spot ang usa ka retiradong mechanical ug electrical engineer human kini nag-unay og pusil sa iyang ulo gamit ang .45 caliber pistol, sulod sa ilang panimalay, didto sa 1213 Leyson Street, Talamban siyudad sa Sugbo.

Ang nagpakamatay naila nga si Vicente Yu Pimentel, 69, nagpuyo sa maong lugar.

Sa imbestigasyon sa Homicide Section sa Cebu City Police Office ubos sa pagpanguna ni SPO4 Rey Cuyos gituohan sa mga kabanay nga ang gihambin niini nga balatian nga chronic lung disease maoy  hinungdan sa paghikog niini.

Sumala pa nga sa wala pa nahitabo ang pagpakamatay ni Pimentel kauban niini sa iyang lawak ang iyang igsuon nga babaye nga si Fatima Pimentel Soliano, apan mihangyo kini nga gusto kini nga mokaon hinungdan nga migawas kini sa lawak aron mag-andam sa pagkaon.

Apan pipila ka minutos ang milabay kalit lang usa ka buto sa armas ang nadungog sa iyang igsuon ug sa bayaw hinungdan nga ilang gidali og sulod ang lawak ni Pimentel, apan ila na lang kini nakita nga naglingkod na kini sa bangko ug duna na’y samad pinusilan sa tuo nga bahin sa iyang ulo nga milapos sa pikas nga bahin.

Samtang  human sa hitabo ang asawa sa nagpakamatay ang mihatag ‘sab sa kapulisan sa usa ka suicide note nga pinirmahan ni Pimentel nga pinetsahan pa niadtong July 29, 2014.

Nakuha sa kapulisan sa crime scene ang usa ka kalibre .45 nga armas, usa ka basiyo sa .45 caliber pistol, tulo ka bala ug usa ka deformed slug. -/EIM) (BANAT NEWS)