Bana milugos sa asawa

CEBU, Philippines – Konduktor og usa ka passenger jeepney gipadakop sa iyang asawa tungod kay matud niya gilugos siya sa iyang bana ug kanunay’ng bun-ogon kun iyang balibaran atol nga kapoy kaayo ang iyang kalawasan.

Si PO1 Mary Rose Megio sa Women Desk Section sa kapolisan sa Presinto 2 sa Mandaue City Police Office (MCPO) mihangyo nga dili lang ilhon ang konduktor nga ilang gidakop aron dili mauwawan ang mireklamo nga 35-anyos nga asawa.

Matud ni PO1 Megio nga ang bana nga mamugos sa pakighilawas sa ilang asawa nga supak sa kagustohan sa babaye maisip gihapon nga usa ka pagpanglugos ubos sa Republic Act 8353 kun Marital Rape Law.

Ang iyang bana nagtrabaho isip konduktor sa PUJ, ang asawa nga taga Barangay Tipolo, Mandaue mitabang usab sa ilang panginabuhian pinaagi sa pagpaninda og painit.

Kaadlawon na nga mauli ang asawa gikan nga naninda.

Gisaysay sa asawa ngadto kang PO1 Megio nga panahon nga mobalibad na ang asawa  moulbo dayon ang kasuko ug mosangpot kini sa pagpamun-og.

Wala na makaantos ang asawa ug midangop sa kapolisan nga nagbase sa Barangay Subangdaku ug hinungdan nga gidakop ang suspek. -/RUB) (BANAT NEWS)