CEBU, Philippines – Duha ang nadakpan sa buy-bust operation sa kapolisan sa Presinto 1 sa Mandaue City Police Office (MCPO) alas tres sa hapon niadtong Domingo sa Zone 3, Mantuyong, sa maong dakbayan.
Si PO2 David Omambac miila sa duha nga nadakpan nga sila si Prendo Garbo, 36, minyo nga nagpuyo sa maong dapit ug Julie Noyna, 40, taga sitio Maharlika, barangay Tipolo. Matud ni Omambac nga si Chief Insp. Jimmy Aguisanda nga maoy ilang hepe sa Presinto 1 ang nangulo sa buy-bust operation human sila makadawat og mga taho labot sa ilegal nga kalihukan ni Garbo sa maong lugar. Ilang kaubang polis nga nagsilbing poseur buyer ang nipalit og shabu kang Garbo pinaagi sa paghatag og P200 nga marked money bugti sa usa ka pakete nga shabu.
Sa pagtunol ni Garbo sa usa ka paketeng shabu dali kining gisignit ug sa pagrikisa nakuha ang lain pang usa ka paketeng shabu. Dihang gidakop si Garbo, naaktohan sa kapolisan si Noyna nga maoy kauban nga ilang gituohang nagpalit usab og shabu kang Garbo hinungdan nga lakip kini sa ilang gidakop. -/GMR) (BANAT NEWS)