Barko nalunod sa Leyte
CEBU, Philippines – Wala’y taga Sugbo nga nalakip sa pagkalunod sa usa ka roll-on/roll-off vessel nga MV/Maharlika II, sa Binit Point, Panaon Island, San Ricardo, Southern Leyte pasado alas 7:00 niadtong Sabado sa gabii.
Si Commodore William Melad sa Coast Guard Central Visayas miingon nga ang Philippine Coast Guard sa Northern Mindanao ang padayon karong nagsusi sa mga pasahero sa maong barko. Matud pa nga dunay na-rescue ang PCG nga 110 ka pasahero ug tulo ang kompirmadong patay ug may laing tulo nga padayon pa’ng missing.
Lakip sa mi-rescue sa maong mga pasahero ang MV Maharlika 4 nga mi-rescue og 32, MV Lara Venture, MT St. Martin nga nakaluwas og lima, MV Orient King, ug ang barko sa Cokaliong Shipping nga MV Filipinas Maasin nga miluwas nila ni Rommel Dabbu Tianson, 39 ug Arvin Maagad Mosqueda, 36.
Matud pa nga gikan sa Lipata, Surigao City ang nalunod nga barko ug padulong kini sa Southern Leyte luwan ang 58 ka pasahero ug 26 ka tripolante.
Base sa inisyal nga imbestigasyon nga naguba ang timon sa maong barko hinungdan sa pagkalunod niini tungod sa paghapak sa kusog nga bawod.
Gani tungod sa kadagku sa bawod, ang barko nga MV Filipinas Dumaguete sa Cokaliong Shipping mibalik sa iyang agi sa Surigao.
Hayan ang maong barko unta makabangal sa nalunod kung nipadayun pa kini sa destinasyon. -/GMR) (BANAT NEWS)
- Latest
