CEBU, Philippines - Gitun-an karon sa konseho sa dakbayan sa Sugbo ang hangyo sa tagdumala sa Hi-Precision Diagnostic Inc. nga ang karsada kilid sa ilang laboratoryo sa dalan Llorente dili na iapil sa pay parking area sa dakbayan.
Ang kadagkoan sa CITOM walay pagsupak sa hangyo sa Hi-Precision apan nag-agad ra sila sa hukom sa konseho sa dakbayan nga maoy adunay katungod pag-amendar sa Pay Parking Ordinance.
Si Konsehal Nendel Hanz Abella maoy miduso og sugyot nga usbon ang ordinansa kabahin sa pay parking kay adunay merito ang hangyo sa Hi-Precision.
Kini tungod kay kasagaran sa mga kliyente niini adunay gihambin nga sakit o kaha mga edaran na ug nagkinahanglan og sayon nga access sa parking space.
Kon maaprobahan ang awhag, ang CITOM-Engineering Section awhagon usab sa restoration sa concrete curb ug gutter lakip sa driveway provision ubos sa C.O. No. 1656 diha sa vicinity sa establisamento nga nag-conform sa parallel parking ubos sa approved building plan sa Office of the Building Official (OBO). (BANAT NEWS)