CEBU, Philippines - Daghang pasahero sa mga passenger jeepney nga nagpanawan sa dakbayan sa Mandaue nangreklamo kay adunay mga drayber nga dili mosunod sa gipatuman nga re-routing ug nakapasakripisyo kanila.
Usa sa gireklamo nga dunay mga drayber nga imbes moliko sila paingon sa Barangay Bakilid, Mandaue gikan sa national highway, ang uban moderitso lang sa Maguikay duol sa flyover ug malayo na hinuon sila sa ilang kanaoganan.
Ang Mandaue City Council mihatag og pagtugot sa Traffic Enforcement Agency of Mandaue (TEAM) sa pagpatuman og 60 ka adlaw nga re-routing sa mga PUJ sugod kaniadtong Septiyembre 3 aron masuwayan kon makatabang ba kini pagpaluag sa trapiko.
Ang re-routing nagmando nga ang mga PUJ nga gikan sa dakbayan sa Sugbo nga nagsubay sa dalan M.C. Briones moliko sa wala subay sa dalan A.S. Fortuna ug moagi sila sa compound sa J Center Mall. Gimando usab nga ang mga PUJ gikan sa amihanang kalungsoran mosubay sa dalan M.C. Briones ug kinahanglang moliko sa tuo inig-abot sa dalan L. Jayme ug moliko sa dalan Albano sa J Center Mall terminal.
Ang mga PUJ nga gikan sa dakbayan sa Sugbo nga para sa Barangay Ibabao ang biyahe adto moliko sa ParkMall ug mohapit sa bag-o nga merkado sa ilang pagpaingon sa Ibabao Estancia. Matud sa mga drayber ang gipatuman nga re-routing nakapataas sa gilay-on sa ilang pagbiyahe.
Dugang nakaproblema sa trapiko mao ang nagpadayon nga pagtrabaho sa Department of Public Works and Highways (DPWH) 7 sa drainage systems diha sa Bakilid lahos na sa Banilad. (BANAT NEWS)