CEBU, Philippines - Gidala sa tambalanan ang usa ka lolo human gidunggab sa laing lolo sa sityo Basuka, Don Andres Soriano (Lotupan), dakbayan sa Toledo.
Ang biktima mao si Isidro Obado samtang ang suspek mao si Juanito Obado, 67-anyos, pulos residente sa nahisgutang lugar. Matud ni PO3 Alexander Demco, duty desk officer, sa gihimong imbestigasyon nga dugay nang adunay panagbangi ang biktima ug suspek.
Nagkaabot ang duha hinungdan nga mitumaw na usab ang kainit sa ilang panagbingkil ug sa wala’y pagduha-duha gidunggab sa suspek ang biktima gamit ang plamingko nga bag-ong gibaid.
Nakaangkon ang biktima og samad dinunggaban sa iyang wala nga dughan hinungdan nga dali kining gidala sa tambalanan sa dakbayan sa Sugbo.
Samtang nasikop usab sa kapolisan ang suspek ug gitanggong na sa Toledo City detention cell ug gikatakdang pasakaan og tukmang kaso. (Raymond Abarcas/GMR)(BANAT NEWS)