Tulo mitulis sa pamilya sa Tabogon

CEBU, Philippines - Gitulis sa tulo ka wala mailhing tawo ang usa ka pamilyahan sa barangay Mabuli, lungsod sa Tabogon sa miaging adlaw diin gihapak pa og pul-an sa revolver ang nawong sa padre de pamilya.

Ang gitulis mao ang pamilya nila ni Oscar ug Marites Tagalong.

Base sa imbestigasyon sa kapolisan nga ang mga wala mailhing tawo misaka sa balay sa mga biktima pasado alas 8:00 sa gabii niadtong Lunes.

Apan sa pagka-Martes na sa udto na-report sa magtiayon ang maong hitabo tungod sa kalayo sa ilang dapit ngadto sa buhatan sa kapolisan.

Matud pa nga dihang nisulod sa balay ang tulo ka lalaki mikatkat kini sa kural ug miagi sa ilang terrace. Mideklarar og tulis ang mga lalaki ug usa kanila mihapak sa dalang revolver sa nawong ni Oscar.

Tungod sa kahadlok sa asawa sa biktima gihatag niini ang P20 mil nga salapi apan gikuha sab sa mga tulisan ang tulo ka cell phone sa magtiayon. Human sa maong hitabo mibalik ra sab sa agi ang mga tulisan ug milayat ra pud sa kural dayong kahanaw. Nagpahigayon pa og follow-up operation ang kapolisan aron mahibaw-an kon kinsa ang responsable sa pagpanulis. (BANAT NEWS)