Mga munisipyo pabutanga’g cctv ug guwardiya

CEBU, Philippines - Giawhag ni Gobernador Hilario Davide III ang tanang lokal nga pangagamhanan sa probinsya nga magbutang og security guards ug closed-circuit television (CCTV) camera aron masiguro ang seguridad sa mga munisipyo. Kini human sa sunod-sunod nga kawat sa mga munisipyo ug siyudad sa probinsya sulod lang sa pipila ka semana.

“LGUs should also install CCTV cameras especially ang sensitive areas within the municipality aron ma-enhance ang security sa kalungsoran. They should also consider hiring of security guards,” matud ni Davide. Dugang pa ni Davide nga kinahanglan siguraduhon usab sa kapolisan nga aduna g’yuy “police visibility” sa mga lugar duol sa mga munisipyo.

Lima na ka munisipyo ug usa ka city hall ang nakawatan sukad Agosto 25 karon tuiga. Kini mao ang mga munisipyo sa Sogod, Carmen, Compostela ug Pinamungajan, ug ang city hall sa Toledo.

Nagkanayon si Davide nga duda niya nga “inside job” ang maong pagpangawat.

Samtang si Regional Director Max Salvador sa National Bureau of Investigation-7 nagkanayon nga nahuman na ang pag-lie detector test sa tulo ka empleyado sa Toledo City hall kalabot sa pagkawa sa giingong P6 million nga kwarta sa dakbayan.

Apan si Salvador nagdumili pagbutyag kun unsa ang resulta sa maong test. Kahinumduman nga ang NBI mihimo og parallel investigation human mi-request si Toledo City Mayor John Henry “Sonny” Osmeña sa ilang buhatan.

Sa laing bahin, si Chief Inspector Ricky Delilis, hepe sa Toledo City Police nagkanayon sa Banat News nga nibalik sila sa Treasurer’s Office kagahapon aron mangutana kun pila g’yud ang exact amount nga nakuha niadtong Septiyembre 6, 2014 apan wala pa kini nasuta. Matud niya nga gusto sa Treasurer’s Office mangayo og tabang sa Commission on Audit (COA) sa pag-audit sa nawagtang nga kwarta. Padayon hinuon ang gihimo nilang imbestigasyon ug wala pay lead kun kinsa ang responsable sa maong paglungkab sa vault. (BANAT NEWS)