Batang naigo sa kilat, nagmerida nang daan

CEBU, Philippines – Inahan niadtong 3rd year high school student sa Ramon Duterte High School ning dakbayan sa Sugbo kinsa naigo sa kilat ug namatay, nagkanayon nagmerida na ug nagpakita og talagsaong lihok ang iyang anak. Matud sa inahan nga si Evangeline Gabijan ang iyang anak nga si William miingon kaniya nga himuong souvenir ang iyang ID sa tunghaan ug dili wagtangon.

Namatikdan usab niini nga magsige og text kaniya ang anak nga mag-ingon: “I miss you” ug “I love you” nga nakahatag og tanghaga sa inahan apan wala lang niya kadto panumbalinga.

Wala kapugngi ni Evangeline ang pagtulo sa iyang luha samtang miasoy sa gidangatan sa iyang anak nga gihulagway sa iyang mga higala nga usa ka buotan ug mahigalaon.

Anaa na karon gihaya sa ilang balay sa Sitio Nangka, Barangay Guadalupe, siyudad sa Sugbo si William.

Matud pa nga nagpahipi sa punoan sa lubi si William dihang giingong naigo sa kilat ang lubi hinungdan nga naapil siya sa gilatayan sa kuryente, maayong pagkasunog sa likod niini.

Suway pa nga gidala sa Vicente Sotto Memorial Medical Center ang bata apan nakabsan gyud ni sa iyang kinabuhi. -/EIM) (BANAT NEWS)