Tulo bata missing

CEBU, Philippines – Tulo ka mga bata ang na-missing human gianod sa dakong baha samtang nitabok sa spillway sa Barangay Lower Linut-od sa lungsod sa Argao kagahapon pasado alas-4 sa hapon.

Sumala pa ni Police Officer 3 Benjamin Geyrozaga sa Argao Police Station nga gikahinabi sa Banat News, ang mga na-missing mao sila si Caroline Marson,15, ug silingan niining si Ritchelle Ann Pasaje,15,  sa Barangay Canbantog, ug ang 13-anyos nga si Earl Kyle Sarbido nga taga Linut-od.

Matud pa ni Geyrozaga, padung na pauli ang mga bata gikan sa eskuylahan sa Calagasan National High School, gibanabanang usa ka kilometro gikan sa nahitaboan. Sumala pa ni Geyrozaga kinahanglang motabok ang mga bata sa dakong suba nga taliwala sa Lower Linut-od ug Canbantog  agi sa spillway nga maagian og sakyanan.

Giingong dili kaayo kusog ang uwan diha sa nahitaboan nianang tungora apan wala makabantay ang mga bata nga kusog diay ang  uwan sa bukid. Sumala pa ni Geyrozaga, nabalda ang search and rescue operation tungod sa uwan ug gabii na  wala pa sila makita. Ang bukana sa sapa padung sa dagat mogawas sa Poblacion.

Samtang sa Cebu City, patay ang usa ka William Gabijan,15, nga taga Nangka, Barangay Guadalupe human naigo sa kilat ang punoan sa lubi duol sa dapit diin siya naligo kauban ang amigo nga amang sa usa ka bakanteng luna.

Sumala pa ni Cristy Miñoza, tanod sa maong barangay nga usa sa miresponde sa dapit nga gikahinabi sa Banat News, naabtan na lang sa mga residente ang bata nga nagkulob ug nasunog ang likod.

Dali nila kining gikarga sa ilang ambulansya ug gidala sa Vicente Sotto Memorial Medical Center apan matud pa ni Miñoza patay na ang bata. (BANAT NEWS)