CEBU, Philippines – Ang gidaghanon sa tawo nga apektado sa sakit nga Human Immunodeficiency Virus (HIV)- Acquired Immune Deficiency Syndrome (AIDS) sa Central Visayas misaka na ngadto sa 295 gikan sa buwan sa Enero ngadto sa Hunyo karong tuiga kumpara sa 235 sa samang buwan sa miaging tuig. Base sa talaan sa Regional Epidemiology and Surveillance Unit (RESU)-7, ang probinsiya sa Sugbo adunay 60 ka mga kaso sa asymptomatic sulod lang sa buwan sa Hunyo. Ang asymptomatic nagpasabot nga ang pasyente posibleng nataptan na niini apan wala pay nanggawas nga sintomas. Sa 60, usa lang niini ang babaye samtang 59 pulos lalaki. Apan sa tibuok rehiyon, 12 ang babaye apan 292 ang lalaki. Sagad sa apektado nag-edad og 25 ngadto sa 34-anyos.
Ang Central Visayas maoy ikatulo sa tanang rehiyon sa nasud nga adunay daghang kaso sa HIV. “So far I cannot disclose names or even addresses of these people,” matud ni Rennan Cimafranca, RESU-7 chief.
Matud niya sagad sa mga natakboyan mga drug addict nga migamit og syringe nga ginamit na sa uban. Ang Vicente Sotto Memorial Medical Center mao lang ang nag-inusarang treatment hub sa Sugbo diin ang antiretroviral medications ipanghatag. Apan ang maong medikasyon dili tambal sa AIDS kun dili igo lang niini pugngan ang pagdaghan sa virus sa lawas ug depende usab sa assessment sa doktor kung ang pasyente magkinahanglan niini o dili.
Aduna nay 7,127 ka mga kaso sa HIV sa nasud nga gipaubos sa maong medikasyon gikan sa 19 ka mga treatment hubs. - /EIM) (BANAT NEWS)