CEBU, Philippines – Singkwenta ka drayber ang nalutsan og bench warrants sa Municipal Trial Court in Cities Branch 1 tungod sa ilang kalapasan sa lagda sa trapiko.
Matud ni Joy Tumulak, operations chief sa City Traffic Operations Management nga ang maong mga drayber wala manumbaling sa ilang mga multa human na-isyuhan og citation tickets sa mga traffic enforcers.
Sigon ni Tumulak nga seryoso ang CITOM pagdisiplina sa mga drayber nga badlungon ug gitambagan sila nga atimanon kini sud sa pito ka adlaw gikan sa pag-isyu. Ang bench warrant gi-issue sa sala ni Judge Monalila Tecson niadtong Huwebes tungod sa kalapasan sa Cebu City Traffic Ordinance 801.
Kadtong mo-settle sa ilang mga multa mahimong i-withdraw sa CITOM ang ilang kiha.
Pwedeng bayran sa mga drayber ang tanang violation ug laing P2, 000 sa kasong napasaka na. Gikan sa buwan sa Marso hangtod Agosto, aduna nay 438 ka kaso nga napasaka ang CITOM sa mga drayber. - /EIM (BANAT NEWS)