CEBU, Philippines - Nakigtagbo kang Bise Mayor Edgardo Labella ang siyam ka kapitan ug usa ka kagawad sa barangay sa dakbayan sa Sugbo nga kaalyado sa Bando Osmeña Pundok Kauswagan (BOPK).
Gipadayag sa mga opisyal ngadto kang Labella ang ilang mga problema sa barangay.
Ang mga kapitan mao sila si Cesar Dolorito sa Babag, Lucrecia Gabato sa Tabunan, Gremar Barete sa Buhisan, Harr Eran sa Cogon, Rodrigo Jabellana sa Bulacao, Tony Caruzca sa Pahina San Nicholas, Jeffrey Navarro sa Kinasang-an, Abraham Desamparado sa San Nicholas Proper, kagawad Rannie Arejo sa Pasil ug Kapitan Julius Guioguio sa Pasil. Gibutyag ni Labella nga usa usab sa nahisgutan ang kabahin sa kalamboan sa South Road Properties (SRP).
Matud ni Labella nga nalipay siya nga miduol kaniya ang maong mga opisyal sa barangay bisan og dili nila kaalyado sa partido. Gibutyag ni Labella nga may mga opisyal na sa barangay nga kaalyado sa BOPK ang nakigkita kaniya apan kagahapon lang nahitabo nga 10 ang nagdungan sa pagpakigtagbo diha sa iyang buhatan.
Lakip sa miatubang sa nahisgutang mga opisyal sa barangay sila si Konsehal Gerry Carillo, Hanz Abella ug Philip Zafra kinsa presidente sa Association of Barangay Councils (ABC). Ang maong mga konsehal sa siyudad namati usab sa mga yango-ngo sa mga opisyal sa barangay aron makahatag usab sila og tabang pinaagi sa konseho.
Lakip sa gibutyag nga problema sa maong mga opisyal sa barangay mao ang kabahin sa baha diha sa ilang lugar ug mga sakyanan nga gikinahanglan.
Subay niini, si Mayor Michael Rama ang mihangop sa pagduol sa mga opisyal sa barangay ngadto sa kagamhanan karon sa siyudad. (BANAT NEWS)