Opinyon sa UP Forester di madawat sa DENR

CEBU, Philippines -  Dili madawat sa Department of Environment and Natural Resources-7 ang resulta sa pakisusi ni UP Los Baños Forestry Professor, Dr. Roger Guzman, nga dili ipaputol ang karaan nga mga kahoy sa habagatang bahin sa lalawigan sa Sugbo.

Si Guzman miingon nga dili ipaputol ang naasoy nga mga kahaoy kay mahimo pa kining i-rehabilitate.

Matud sa tigpamaba sa DENR-7, Eddie Llamedo nga si Guzman usa ka Silviculturist, sangang pagtuon sa forestry nga nagpunting sa mga pag-cultivate sa mga kahoy ug dili tree pathologist hinungdan nga makonsiderar nga dili expert opinion ang findings ni Guzman.

Si Llamedo nitug-an nga nagpaabot sila sa mga environmental groups sama sa Movement for Livable Cebu ug Philippine Earth Justice Center Inc. nga makapangita og tree pathologist alang sa independent opinion kay dili man usab kini mosugot nga ang mga tree pathologist sa DENR Manila mao ang mopahigayun og inspeksiyon sa mga kahoy. Gidugang hinuon ni Llamedo nga sa pagkakaron pabilin nilang gituman ang mando ni DENR Sec. Ramon Paje nga nagdili sa pagputol sa naasoy nga karaang kahoy sa dakbayan sa Naga, San Fernando ug dakbayan sa Carcar.

Samtang napadangat na sa DENR-7 ngadto kang Paje ang suwat hangyo nilang Gob. Hilario Davide III ug San Fernando Mayor Antonio Canoy nga nag-aghat sa kalihim sa paglibkas na sa kamandoan nga nagpahunong sa pagputol sa karaang mga kahoy sa daplin sa dalan sa maong mga lugar.

Tuyo sa hangyo nga mapadayon ang tinguha sa pagputol sa ubay-ubay nga karaang kahoy sa naasoy’ng mga lugar.  (BANAT NEWS)