CEBU, Philippines - Patay ang usa ka 66- anyos nga pasahero nga lola human sa panagsungag sa duha ka traysikol sa national highway sa Barangay Bulasa, Argao niadtong Domingo sa buntag.
Si PO2 Paulino Sanchez mibutyag nga gikan sa managlahing direksiyon ang duha ka traysikol nga gimaneho nila ni Benedicto Abong Jr., 39, ug Sabino Corporales, 59, minyo taga Bulasa, Argao.
Samtang ang namatay nga pasahero naila nga si Juanita Villagonzalo kinsa napiit sa gisakyang traysikol nga gimaneho ni Corporales.
Sumala pa ni Sanchez nga posibleng parehong milikay sa libaong sa dalan ang duha ka traysikol samtang nagsugat maong nagkabangga.
Dali nga gidala sa South General Hospital sa Naga City ang biktima apan nakabsan kini sa iyang kinabuhi, samtang nakaangkon sab og mga bun-og ang duha ka drayber.
Kasong reckless imprudence resulting to homicide ang gipasaka na sa kapulisan batok sa duha ka drayber.
Samtang naangol usab ang duha ka tawo dihang gidumbol ang traysikad sa naghaguros nga motorsiklo diha sa Barangay Gabi, Cordova sa miaging Domingo sa gabii.
Ang mga naangol mao sila si Ronald Wahing ug Joseph Curt Bien Pangan, 21.
Si SPO1 Laurencio Wagwag sa Cordova Police Station, si Wahing nagmaneho og traysikad padulong sa Poblacion ug nagsunod si Pangan gikan sa Dakbayan sa Lapu-Lapu luwan sa iyang motor.
Giingong kusog kaayo ang dagan ni Pangan ug nadumbolan ang gisundang traysikad ni Wahing hinungdan sa pagsaliring sa duha ug gihatod ngadto sa Lapu-Lapu City Hospital. - /EIM) (BANAT NEWS)