CEBU, Philippines - Patay ang usa ka construction worker ug angol ‘sab ang kauban niini human sila gipamusil sa duha ka lalaking nagmotor diha sa Sitio Plaza, Apas, Cebu City, kagahapon sa alas 7:45 sa buntag.
Ang namatay naila nga si Julmer Durango, 32, samtang naangol si Gomer Ricaborda nga nagpuyo sa Barangay Tubod, Sibonga, Cebu nga gikatahong usa ka konsehal sa ilang barangay.
Matud pa ni PO1 John Erick Samosa sa Homicide Section sa Cebu City Police Office nga nahinabi sa Banat News naglingkod ang duha dihang gihunongan sa duha ka lalaki ug nangutana og asa si Durango.
Dihang misanong si Durango, gipusil dayon kini sa backrider apan gitapi kini ni Durango hinungdan nga ang naigo si Ricaborda sa kilid sa lawas. Apan gibalikan kini pagpusil sa gunman sa makadaghang higayon hangtod nga nahagba ug nakabsan sa kinabuhi.
Dose ka basiyo sa bala sa kalibre 45 ug usa ka buhing bala niini ang nakuha sa crime scene. (/EIM)(BANAT NEWS)