Sen. Santiago modagan pagka-presidente

CEBU, Philippines - Human sa pagkaayo sa lung cancer gipadayag ni Senador Miriam Defensor Santiago ang iyang kaikag paglansar isip presidente sa nasod sa umaabot nga 2016 elections. 

Matud pa ni Santiago nga giawhag siya sa mga lider sa katilingban nga molansar, ang gipasabot ni Santiago mao si Fr. Joaquin Bernas usa sa mga eksperto sa Batakang Balaod sa nasod.

Sa usa ka television interview supak si Bernas nga lugwayan pa ang termino ni Aquino ug miingon kini hatagan og tsansa si Miriam.    

Matud pa sa senadora nga human nga napildi niya ang sakit nga cancer nagplano na siya sa iyang karera tungod kay last term man sad niya karon isip senador.

Si Santiago miingon nga sa higayon nga modagan siya isip presidente adto siya mopasilong sa iyang kaugalingong partido nga People’s Reform Party apan miangkon siya nga kinahanglan niyang makig-alayon sa ubang mga partido.

Lakip na niini ang Liberal Party ni Presidente Benigno Aquino III,  nga gipangulohan sa kalihim sa transportasyon nga si Emilio Abaya ug ang  Nacionalista Party sa kanhi senador nga si Manny Villar. (BANAT NEWS)