Sign language expert gikuha sa daanbantayan police
CEBU, Philippines - Kasong murder ang ipasaka sa kapulisan sa usa ka lalaki nga gitudlo nga mipatay sa manghod sa iyang asawa nga 12- anyos sa Sitio Pasil, Logon, Daanbantayan , Cebu, niadtong nakalabay nga adlaw. Kini ang gibutyag ni PO3 Joel Pino sa Daanbantayan Police nga nahinabi sa Banat News lig-on kaayo ang ilang basehan aron mapasaka ang kasong murder batok kang Alberto Hermosa.
Sumala pa niya “vital witness” ang amang nga nakakita sa maong hitabo nga si Benjie Molejon kay usa kini sa gikulata sa suspek sa dihang misuway kini og duol pagkakita niini nga gibinaklid ug gibunal-bunalan og kahoy ang biktima nga si John David Diano.
Samtang sa padayon nga gihimo’ng imbestigasyon sa kapulisan gikuha ‘sab sa Daanbantayan Police ang tabang ni John Paul Maunes, usa ka “certified sign language interpreter.”
Si Maunes sakop sa Gualandi Volunteers Service Program, nga konektado og mao’y tig-interpret sa balita sa usa ka lokal TV station dinhi sa Sugbo.
Gipaabot nga sa adlaw nga Lunes ilang mapasaka ang kaso batok sa suspek nga karon gipaslak na sa Daanbantayan Police Station.
Niadtong Domingo na-missing ang bata ug nakit-an kini niadtong Miyerkules human nga nipakita ang kalag niini sa mga silingan ug mitultol kanila sa nahimutangan sa iyang lawas. (BANAT NEWS)
- Latest
