CEBU, Philippines - Ang executive director sa Cebu City Disaster Risk Reduction Management Council miawhag sa kabarangayan sa siyudad nga motabang usab sa pag-monitor kabahin sa problema sa baha diha sa ilang mga lugar.
Si Simeon Romarate sa pakighinabi niini sa Banat News kagahapon mibutyag nga mga basura gihapon ang hinungdan sa pagbara sa mga kanal.
Atol sa pagbunok sa uwan kagahapon, paspas kaayo nga miawas ang sapa sa Manalili nga mipadulong sa V.Gullas, D. Jakosalem, ug Colon. Dunay mga sakyanan nga nangapagngan og makina diha sa maong mga dalan.
Nasayran nga hasta sa eskina sa Bonifacio ug Sikatuna sa Barangay Pari-an naglunop usab ug pipila ka mga balay ang nangasudlan og tubig baha.
Si Romarate miingon nga dunay de-clogging operation ang siyudad sa mga kanal apan wala pa kini mahuman.
Matud ni Romarate nga sa wala pa mobundak ang kusog nga uwan kagahapon gi-monitor na nila ang north ug south sector ug lakip na sa posibleng pagdahili sa yuta sa mga bukirang barangay. Kagahapon, liboan ka mga pasahero lakip mga tinun-an ang nangatanggong tungod sa baha ug pagkilom-kilom nagdasok og inilogay pagsakay og jeep pauli sa ilang mga balay. (BANAT NEWS)