CEBU, Philippines - Gibarogan sa hepe sa Provincial Intelligence Branch (PIB) nga dili rub out ang nahitabo sa ilang operasyon sa lungsod sa Liloan diin ilang napatay ang target sa search warrant nga usa ka tigpayuhot og illegal drugs.
Matud pa ni Superintendent Rodulfo Albotra nga lehitimong operasyon ang ilang gihimo ug andam silang moatubang kon dunay moreklamo sa maong hitabo nga miresulta sa kamatayon ni Noel Codeniera.
Gipasabot ni Albotra nga dili siya motugot nga mabutang sa peligro ang kinabuhi sa iyang mga sakop ug sa mga inosenteng sibilyan.
Sumala pa sa hepe sa PIB ilang nakita nga miibot og armas si Codeniera mao nga ilang giunhan og pusil.
Gihulagway ‘sab sa opisyal nga duna’y high-powered firearms ug granada sa balay sa suspek nga mahimo niining gamiton batok sa kapolisan. “Capable gyod siya nga mosukol based sa nakuha nga armas, ang balay niya naa pa’y motion sensor, reinforced pa g’yud ang balay, pultahan, kinsa man ang gipangandaman ato niya?” sigun pa ni Albotra.
Duna sa’y nakuha nga impormasyon ang kapulisan nga kasagaran sa mga drug personalities karon mokuha na og mga kriminals aron ilang himoon nga kauban sa grupo nga andam ‘sab manukol sa kapulisan.
Lima ka mga sakop ni Codeniera ang nadakpan human sa maong raid, apan ang usa niini nga si Dennis Tautho gibuhian human nasuta nga igo lang kini nga gipatrabaho sa balay sa suspek ug naatlan lang nga didto sa balay. - /EIM) (BANAT NEWS)