CEBU, Philippines- Kasong murder ang gikatakdang ipasaka sa Provincial Intelligence Branch (PIB) sa Cebu Provincial Police Office batok sa konsehal sa barangay sa Poblacion Alcoy nga mipusil patay sa hepe sa kapulisan sa maong lungsod, niadtong nakalabay nga adlaw.
Si Superintendent Rodolfo Albotra ang hepe sa PIB nagkanayon nga ilang ibase ang kasong ipasaka sa imbestigasyon ilabi na kun matino ang motibo sa hitabo ug kun giunsa paghimo ang krimen tungod kay dunay mga report nga nag-ingong nagtalikod si Inspector Crisanto Abella dihang unang gipusil ni Ciriaco Delos Santos ug pagkahuman gitiwasan.
Gimandoan ‘sab ni Albotra ang kapulisan sa lungsod sa Boljoon nga maoy mo-imbestigar sa kaso apan moabag ang PIB kanila. Sa pakighinabi sa Banat News sa Officer In-Charge (OIC) sa Boljoon Police nga si SPO3 Rogelio Fernandez, kini mitug-an nga ila nang gisugdan ang imbestigasyon.
Gipasalig niyang patas ang resulta sa imbestigasyon bisan kauban nila ang biktima. Si Delos Santos gitanggong na sa Talisay Police detention cell. - /EIM) (BANAT NEWS)