CEBU, Philippines- Patay ang usa ka drayber sa motorsiklo human kini mipilit sa kilid sa usa ka V-Hire Nissan Urban sa kurbadahong karsada sa sitio Tiguib, Malubog, dakbayan sa Sugbo kagahapon sa alas 3:30 sa hapon.
Giila ang namatay nga si Glen Satorre, 27, ulitawo taga Sitio Butong, Sudlon II sa maong dakbayan samtang ang nagmaneho sa V-Hire mao si Mario Delos Reyes, 27, taga lungsod sa Asturias.
Matud ni Hector Arcenal, base control operator sa Cebu City Traffic Operations Management (CITOM) nga gikan sa dakbayan ang V-Hire ug padulong sa Balamban samtang gikasugat ang motorsiklo padulong sa dakbayan.
Sumala pa ni Arcenal nga wala nagka “head on” ang duha ka mga sakyanan ug matud pa didto sa dapit sa pultahan sa drayber mipilit si Satorre.
Grabeng bun-og sa kalawasan ang naangkon sa drayber sa motorsiklo kinsa dali pa unta nga gidala sa Vicente Sotto Memorial Medical Center (VSMMC) apan nakabsan gyud sa iyang kinabuhi. Matud ni Arcenal nga nagsuot og helmet ang drayber sa motorsiklo. - /GMR) (BANAT NEWS)