CEBU, Philippines- Usa ka pulis ang gipusil gawas sa Lapu-Lapu City Police Station 3 kagahapon sa kaadlawon sa D. Mangubat Street sa dakbayan sa Lapu-Lapu human misita sa usa ka wala mailhing lalaki nga nag-estambay sa mao nga dapit.
Si PO1 Ezekiel Melodia II, taga Santa Catalina, Negros Oriental ug nadestino sa LCPO- Station 3 nakaangkon og samad pinusilan sa iyang likod. Matud ni Police Senior Inspector Wilbert Parilla, hepe sa Police Station 3 nga nahitabo ang pagpusil ala 1:40 sa kaadlawon samtang off-duty ang maong polis ug migawas kini sa police quarters aron mopalit og sigarilyo.
Dunay nabantayan si Melodia nga usa ka lalaking nagtindog sa gawas ug kadudahan ang lihok maong iyaha kining giduol aron unta sitahon apan kalit siyang gipusil niini.
Ang maong lalaki dali nga miikyas human sa hitabo samtang gitabang sa mga kauban si Melodia ug gidala sa Mactan Doctor's Hospital.
Wa pay ideya ang kapolisan kun si kinsa ang maong gunman ug kung unsay tuyo niini nga nagpahipi kini nianang mga orasa sa maong dapit. - /EIM) (BANAT NEWS)