CEBU, Philippines - Nadiskubrehan sa mga sakop sa National Food Authority-7 nga daghan sa ilang mga rice retailers ang wala mo-display sa ilang bugas hinungdan nga higpit nila kining gipahimangnoan.
Ang public information officer sa NFA-7, Lucy Rosales, miingon nga nakadawat sila og mga reklamo gikan sa mga konsumedor sa dakbayan sa Mandaue, Consolacion ug uban pa’ng kalungsuran sa pagnihit sa bugas sa NFA. Kini ang hinungdan nga naghimo sila og ocular inspection sa ilang mga rice retailers ug ilang nasuta nga daghan sa ilang mga accredited rice retailers ang wala mo-display sa ilang tindahan.
Sagad sa rason mao nga ang gigahin kanilang sinakong bukas sa NFA kadali ra nga mahurot ug dili maabtan og usa ka semana. Apan gitataw ni Rosales nga wala dawata sa ilang buhatan ang pangatarungan.
Ang mga retailers nga ang tindahan anaa sa mga public market maoy ilang gahin ang 32 ka sakong NFA rice ug 22 usab ka sako ang ilang gahin sa matag semana sa ilang rice retailers sa mga tindahan nga nahimutang sa gawas sa merkado publiko.
Gitataw ni Rosales nga P27 lang ang matag kilo sa ordinaryong bugas sa NFA ug ang primira klase nilang bugas nga ikatandi usab ang kalidad sa commercial rice P32 ang matag kilo niini. (BANAT NEWS)