CEBU, Philippines - Mokabat kapin sa P100 mil nga kantidad sa shabu ang nasakmit sa Municipal Anti-Illegal Drugs Special Operations Task Group (MAIDSOTG) sa Dumanjug gikan sa gituohang tigpahuyot sa barangay Lawaan.
Dala ang search warrant nga gi-isyu ni Judge Leopoldo Cañete sa Regional Trial Court (RTC) Branch 60 sa Barili, ang subject naila nga si Eddie Escoreal Magudato, residente sa maong lugar.
Apan sa gipahigayong operasyon, nasikop si Angelica Alonso Magudato, 45, asawa sa subject kinsa wala maabti sa gipuy-an niini.
Malinawon ug wala’y nahimong komosyon sa gipahigayong operasyon sa kapolisan sa pagsuhid sa panimalay sa suspek.
Nasakmit sa mga awtoridad ang 14 ka medium size, 32 ka gagmay’ng pakete nga mga gituohang shabu nga motimbang og 8.87 gramos ug mobalor og P103, 604.
Nakuha usab ang timbangan, cellphone, cash money, drug paraphernalia ug armas nga kalibre .38 revolver.
Gitanggong na sa Dumanjug Police Station ang dinakpan kinsa mag-atubang og kasong kalapasan sa Republic Act 9165 o ang Comprehensive Dangerous Drugs Act of 2002 ug Republic Act 10591 kun Comprehensive Law on Firearms and Ammunition. (BANAT NEWS)