Ginang gipusposan, gidakdaka’g bato

CEBU, Philippines - Bali ang bukton, nahuboy ang ulo ug nakaangkon og daghanang bun-og sa kalawasan ang usa ka 52-anyos nga babaye human kini pusposi og kahoy sa iyang kanhi umagad diha sa Cogon, Pardo, Cebu City.

Ang biktima naila nga si Marlina Cinco, nagpuyo ra sab sa maong lugar ang iyang umagad nga si Jomel Abarola, 22, nga nasuko sa biktima kay gibuwag silang duha sa anak niini nga iyang gikapuyo kaniadto.

Matud pa ni PO1 John Erick Samosa sa Homicide Section sa Cebu City Police Office nga nahinabi sa Banat News, nagkabo og tubig ang biktima dihang kalit giduol ug gipusposan sa suspek og kahoy.

Maayong pagkabali ang bukton sa biktima human nga iya pa unta nga gisulayan og sagang ang pagbunal, tungod sa kakusog sa pagbunal milukapa sa yuta ang biktima ug nawad-an og panimuot.

Sumala pa ni PO1 Samosa nga wala pa matagbaw ang suspek, mikuha pa kini og bato ug gihapak sa ulo sa biktima. Ang mga residente sa maong lugar nga nakakita sa panghitabo dali sab nga mitabang sa biktima hinungdan nga misibat ang suspek. Gidala si Cinco sa Cebu City Medical Center (CCMC).  (BANAT NEWS)