Mga kahoy dili ipaputol
CEBU, Philippines - Ang kamandoan ni DepEd-7 Regional Director Carmelita Dulangon nga pamutlon ang mga dagko ug karaang kahoy, ilabi na ang acacia, palibot sa mga tunghaan kalapasan diay sa lagda sa Department of Education.
Usa ka kanhi opisyal sa DepEd-7 nga nihangyo nga dili lang ilhon mitug-an nga ang gimando ni direktor Dulangon kalapasan sa DepEd Order No. 33 s. 2008 nga giluwatan ni kanhi Secretary Jesli Lapus.
Ang mao nga kamandoan nagmando sa tagdumala sa tanang public ug private schools sa tibuok nasud nga mananom og kahoy sama sa narra, molave, acacia ug kamagong aron mabatokan ang epekto sa global warming. Gimando sa kanhi opisyal sa DepEd ang “extensive tree-planting, tree-growing and tree-caring activities” sa mga school campus.
Matud sa kanhi opisyal sa DepEd nga sa mao nga kamandoan gidili ang pagputol sa mga kahoy.
Apan si Dulangon mipasabut nga ang iyang katuyoan mao ang pagkonsulta sa kadagkoan sa Department of Environment and Natural Resources (DENR-7) kon angay ba nga pamutlon ang mga kahoy.
Ang gikabalak-an ni Dulangon nga may mga tinun-an unya nga matumbahan sa kahoy ug mangamatay. (BANAT NEWS)
- Latest
