10 mil ka marijuana ang nalarot sa RPSB-7 ning semanaha

CEBU, Philippines - Mukabat sa 10 mil ka punoan sa marijuana ang kinatibuk-ang nalarot sa Regional Public Safety Battalion (RPSB)-7 sulod lang sa nakalabay nga semana sa mga bukirang bahin sa Dalaguete ug Badian.

Kini maoy gitug-an ni Inspector Irvin Bellen ug Inspector Alvino Enguito sa RPSB-7.

Sumala pa sa mga opisyal nga usa ka major operation ang ilang gilusad sa maong mga lugar base sa nadawat nila nga impormasyon sa mga residente sa maong dapit.

Si Enguito mitug-an nga ilang naagian ang maong plantation sa marijuana didto sa boundary sa Dalaguete ug Badian nga sumala pa maayo’ng pagkatanom ug giatiman ‘sab pag-ayo.

Dugang pa ni Enguito nga giabunohan pa ang maong mga marijuana ug gihawanan pa sa sagbot ang mga punoan niini.

Gipasabot sab ni Enguito nga gumikan sa kadaghan sa mga marijuana nga ilang nakuha ug malisod  dad-on sa ubos, ila nalang nga gidaoban ang mga marijuana sa maong lugar human gidokumento ug mikuha nalang sila og sample nga gihatod sa Philippine Drugs Enforcement Agency (PDEA)-7.

Matud pa sa duha, duna pay uban pang mga lugar sa Sugbo nga ilang gipanid-an nga dunay mga gipananom nga marijuana.  (BANAT NEWS)