Polis nga wa motunga sa drug test gitagalan
CEBU, Philippines - Wala na gyud mopakita kadtong polis nga wala makatunga sa gipahigayong kinalit nga drug test sa Mandaue City Police Office.
Tungod niini, gitagalan ang maong polis kutob karong Domingo aron dili ibutang nga Absent Without Official Leave (AWOL).
Niadtong Hulyo 31 mipahigayon og surprise drug test ang MCPO sa mga polis sa Casuntingan Police Station.
Ang hepe sa Casuntingan, Senior Insp. Philip Silva, miasoy nga usa sa iyang sakop nga si PO1 Wendell Lumbab ipailawom sa imbestigasyon human napakyas sa pagtunga.
Matud ni Silva nga kon dili siya matagbaw sa pagpasabot ni Lumbab, hayan mag-atubang kini og kasong administratiba ug posible pa’ng mataktak sa serbisyo tungod sa AWOL.
Atol sa drug test nakontak pa ni Silva si Lumbab ug miingon nga moapas ra sa drug test tungod kay nagpatupi pa apan hangtud karon wala gyud mopakita. (/GMR)(BANAT NEWS)
- Latest
