CEBU, Philippines - Gidakop sa kapolisan ang 10 ka tawo nga nagpasiugda og ilegal nga swertres sa dungan nga operasyon nga gihimo sa managlahing barangay sa dakbayan sa Mandaue alas 6 sa niaging gabii.
Si SPO3 Antonio Descartin sa Presinto 4 sa Mandaue City Police Office miila sa ilang mga nadakpan nga sila si Shean Buhat, 24, sa Pilit, Cabancalan; Lord Tawad, 21, sa Maguikay; ug Perla Mea Cahulogan, 19.
Si Senior Insp. Genilo Veraque, hepe sa Presinto 3 sa MCPO miila usab sa ilang nadakpan sa Pagsabungan nga sila si Kevin Cavite, 21, taga Labangon, dakbayan sa Sugbo; Sicayana Santos, 23, taga Lawaan, dakbayan sa Talisay; Cjay Cortes, 20, taga Lamac, Consolacion; Kim Eborda, 26, taga Cagayan de Oro City.
Ang hepe sa Investigation Detection and Management Bureau (IDMB), Senior Insp. Jimmy Portes, nga nangulo sa laing grupo sa operasyon sa Orel, Banilad miila usab sa ilang nadakpan nga sila si James Mercado Flores, 20, taga Aroma, Subangdaku ug Ronald Allan Tabanao Orangurin, 25, taga Labangon, dakbayan sa Sugbo.
Samtang sa Paradise, Looc nadakpan si Marak Ador Casis, 21 nga taga Bulacao, dakbayan sa Sugbo.
Ang mga dinakpan naaktohan nga nang-isyu og numero sa swertres ug nasakmitan sa kapolisan og mga tally sheets, calculator ug nagkalain-laing kantidad sa salapi. (/GMR)(BANAT NEWS)