CEBU, Philippines - Gipasalig sa National Bureau of Investigation (NBI-7) nga dili manghilabot sa gihimo nga imbestigasyon sa kapulisan labot sa usa sa ilang sakop nga gidakop kagahapon sa buntag tungod sa alegasyon nga pagpanghapak niini og armas sa iyang kasakay sa jeep de pasaheroan.
Nasayran nga gikostudiya sa Parian Police Station si Roel Caballero, cashier sa NBI nga nadestino sa ilang satellite office sa usa ka mall sa siyudad sa Mandaue.
Si Caballero gidakop sa usa ka tanod sa T. Padilla human gikalayog sulod sa jeep ang usa ka kargador nga giila nga si Rogelio Catalan human ang duha naglayog sa sud sa jeep. Giingong wa tuyoa nga natumban ni Caballero ang tiil ni Catalan sa pagsaka niini apan giingong nagsige og yawit si Catalan hinungdan nga nagkasiningkahay silang duha ug nibunot og armas si Caballero. Matud pa ni SPO1 Camay nga pwerting kuyawa sa mga pasahero sa dihang nakakita sa .357 revolver sa maong NBI agent ug ang uban nanglumba og panglayat sa jeep.
“Upat ka mga impormante ang naabot diri sa police station kay naa lagi daw tulis, kadto diay nga hitabo, nakakita man gud sila og armas”, matud pa ni SPO1 Camay.
Hinoon, human magkasabot ang duha ka habig nakagawas ra usab sa prisohan ang NBI agent. Dihang nahitabo ang insidente si Caballero paingon unta mo-duty. (/EIM)(BANAT NEWS)