CEBU, Philippines - Tulo ka mga lalaki nga sakay sa usa ka Montero Sport SUV ang gisikop sa Provincial Highway Patrol Team (PHPT Cebu) human nga wala mohunong sa checkpoint ug dihang naapsan nasakpang dunay mga high-powered firearms sulod sa sakyanan diha sa Tungkop, Minglanilla kagahapong adlawa.
Giila ang mga dinakpan nga sila si Fil Canceran, 34, Winster Heraldez, 28, pulos taga Naga City ug Junifer Yosores Potestas Jr., 22, taga Tabunok, Talisay City.
Matud pa ni Inspector Miguel Ngo ang Officer In-Charge (OIC) sa Provincial Highway Patrol Team nga samtang sila naghimo og checkpoint sa maong lugar, ilang nabantayan nga dili maklaro ang plate number sa sakyanan sa mga suspek nga paingon sa dakbayan sa Talisay, hinungdan nga ila kini nga gipara. Apan imbes nga mohunong, mipabulhot hinoon sila og padagan hinungdan nga ilaha kining gigukod.
Nakuha sa mga polis ang tulo ka kalibre .45 pistola nga puno og mga bala ug usa ka KG-9 submachine pistol apan pulos way papeles nga napresentar atol sa pagsitar kanila.
Gawas sa mga armas nakuha sab sa mga operatiba sa likod nga bahin sa sakyanan ang mga drug paraphernalia ug usa ka upper uniform sa Regional Mobile Group (RMG 7) nga duna’y tatak nga apelyedo nga “VILLARMIA.” (BANAT NEWS)