CEBU, Philippines - Ibalhin sa laing instalasyon sa Kapitolyo ang unom ka jailguards sa Cebu Provincial Detention and Rehabilitation Center nga gidudahang tigpayuhot og ginadiling drugas.
Nakab-ot ang maong desisyon atol sa gipatawag nga tigum ni Provincial Administrator Mark Tolentino kagahapon samtang wala pa’y ebidensiya batok sa maong mga jailguards.
Planong suspensuhon unta ang maong mga jailguards apan ibalhin una sila sa ubang instalasyon nga iya sa Kapitolyo.
Matud ni Tolentino nga dili igo nga ang nakit-ang gamit sa pagsuyop og shabu sulod sa CPDRC magtumbok sa mga gikatahapan sanglit pulos lang pagduda kung diin gikan mismo ang maong mga gamit.
Nitumaw ang isyu dihang aduna’y nadakpan sa lungsod sa Liloan nga nagdala og drugas ug misumbong nga gikan sa CPDRC ang suplay.
Padayon ang imbestigasyon nga himoon sa Committee on Discipline and Investigation (CODI) nga gipangulohan ni Tolentino samtang ibalhin pa ang mga guwardiya. Gipaabot usab ang desisyon ni Gobernador Hilario Davide III kinsa atoa karon sa nasud sa Thailand. (BANAT NEWS)