Engineer gipasanginlang nanglugos
CEBU, Philippines - Gidakop sa kapolisan ang usa ka engineer nga nagtrabaho sa usa ka dako’ng pabrika og mga relo diha sa Mactan Economic Processing Zone (MEPZ) nga gipasanginlan nga milugos sa iyang katabang.
Ang pagpanglugos didto mahitabo sa balay sa suspetsado nga si Rolando Abasolo, 38, sa Sitio Sudtunggan, Barangay Basak dakbayan sa Lapu-Lapu. Ang suspetsado nga adunay tulo ka anak sa iyang asawa gidakop sa mga sakop sa Lapu-Lapu City Police Office (LCPO) Station-4 human nga ang 17-anyos nga biktima midangop kanila ug nangayo’g tabang.
Si PO2 Marites Alsola sa Women and Children’s Protection Desk miingon nga gitug-anan sila sa biktima nga sa miaging Lunes gisuwayan siya’g lugos ni Abasolo apan nakaikyas siya. Pagka Martes milampos g’yud ang suspetsado paglugos kaniya.
Kasong rape ug kalapasan sa RA 7610 kun Special Protection against Child Abuse, Exploitation and Discrimination Act ang ipasaka sa mga polis batok ni Abasolo. Hinuon ang suspek nanghimakak sa pasangil. (BANAT NEWS)
- Latest
