LTFRB nakigtagbo sa transport groups

CEBU, Philippines- Usa ka transport dialogue ang gipasiugdahan kagahapong adlawa sa Land Transportation Franchising and Regulatory Board (LTFRB)-7 uban sa kadagkoan sa  lainlaing transport group dinhi sa Sugbo.

Ilang gituki ang pipila ka mga lagda sa Joint Administrative Order 2014-01 nga giisyu sa Department of Transportation and Communications (DOTC) nga nagpausbaw sa multa sa mga madakpan nga drayber ug operators sa mga publiko nga sakyanan.

Mismo si LTFRB chairman Winston Ginez  ug laing duha ka board members mitambong sa mao nga dialogue.

Mitambong usab ang kapin sa napulo ka transport leaders nga narepresentar sa nagkadaiyang transport organizations gikan sa jeepneys, taxi, trucks, buses ug uban pa.

Si Ryan Benjamin Yu, chairman ug general manager sa Cebu Integrated Transport  Cooperative  (CITRASCO) misugyot sa paghimo’g kausaban sa probisyon sa JAO 2014-01 kabahin sa isyu sa “out of line.”

Nasuta nga ubos sa maong lagda, derikta nga pahamtangan sa silot ang mga operators apan buot nilang butangan kini og first, second ug third offense.

Apan matud ni Ginez nga dili nila kini mahimo ang sugyot sa CITRASCO sanglit nahimoan na man kini og pagtuon didto sa kaulohan.

Gidugang ni Yu nga wala ray kalainan ang mga kalapasan didto sa kaulohan ug dinhi sa Sugbo.

Mibahad si Yu nga kon dili paminawon sa LTFRB ang ilang awhag, hayan nga mohimo sila og legal nga lakang ug gihangop usab ni Chairman Ginez.

Matud ni Ginez nga duna na gani upat ka kaso ang gipasaka didto sa Korte Suprema nga mikwestyon sa JAO 2014-01.

Hinuon andam ang LTFRB nga mosusi sa awhag sa transport group  kon angayan ba nga amendahon ang probisyon nga ang operator maapil sa mga kalapasan nga  mahimo sa ilang mga drivers, sama sa dili pagtuman sa seat belt law, over ug under charging sa plitihan ug uban pang mga kalapasan.

Gitataw ni Ginez nga ilang tun-an ang maong probisyon sa dili pa kini hingpit nga ipatuman karong Oktobre 17.

Kahinumdoman nga daghan ang misupak diha nga gi-implimentar ang JAO 2014-01 niadtong Hulyo 19 nga maoy hinungdan sa sunod-sunod nga transport strike tungod sa kabug-at sa silot. (BANAT NEWS)