Lalaking gipatay wa pa mailhi
CEBU, Philippines- Pabiling wala mailhi ang usa ka lalaki nga gipusil patay sa duha ka mga mamumuno sa sitio Malipayon, Inawayan, dakbayan sa Sugbo.
Matud ni SPO4 Rey Cuyos sa homicide section sa Cebu City Police Office (CCPO) nga padayon pa silang nagpaabot sa mga posibleng mokuha sa patay nga lawas nga anaa sa St. Francis Funeral Homes.
Gihulagway nga anaa sa edad 27-anyos ang biktima, 5’4 ang gitas-on, nagsuot og itom nga jacket, orange nga T-shirt, maong pants ug nagsuot og brown nga sapatos.
Nakuha sa kapolisan gikan sa lawas sa biktima ang usa ka 9mm pistol, mga bala ug uban pa’ng personal nga gamit apan wala’y bisan usa ka ID ang nakuha.
Sumala pa ni Cuyos nga wala’y nakaila sa mga residente sa maong lugar sa biktima.
Nanawagan ang kapolisan kon kinsa kadtong nawad-an og sakop sa pamilya nga makig-alayon lang sa ilang buhatan aron sa pag-ila sa patay’ng lawas. - /GMR) (BANAT NEWS)
- Latest
