CEBU, Philippines- Nadunggaban ang drayber sa traysikad nga naningil og P8 nga plete sa iyang pasahero sa sitio Lambay, Kalawisan, dakbayan sa Lapu-Lapu alas 8 sa gabii niadtong Sabado.
Ang biktima mao si Arman Quirante, 32-anyos, minyo nga nagpuyo sa maong lugar ug ang nagdunggab mao si Ramie Tampus, hingkod ang panuigon nga taga Zone Kasag sa maong barangay.
Si PO1 Jomar Florentino sa homicide section sa Lapu-Lapu City Police Office (LLCPO) miingon nga pasahero sa biktima ang suspetsado nga misakay sa eskina sa Kalawisan ug nagpahatud sa Zone Kasag.
Sa paghidangat sa maong dapit, naningil ang drayber og P8 nga gikasuko sa suspetsado.
Nagkalalis ang duha ug kalit miibot sa giluklok nga kutsilyo ang suspetsado ug gidunggab ang kilid sa biktima dayong dagan pahilayo sa lugar.
Ang biktima gidala sa mga molupyo sa Lapu-Lapu City Hospital apan gibalhin sa Vicente Sotto Memorial Medical Center sa dakbayan sa Sugbo. - GMR) (BANAT NEWS)