‘Level 2’ pusher sa Opon nasikop

CEBU, Philippines- Nasikop sa kapolisan sa siyudad sa Lapu-Lapu ang usa ka “level 2” drug pusher sa Zone Pansat, barangay Calawisan.

Ang suspetsado nga si Aldrin Potot alyas "Al" gidakop pinasikad sa search warrant nga giisyu ni Judge Teresita Galanida sa RTC Branch 56 sa dakbayan sa Mandaue.

Nasikop usab ang laing kauban ni Potot nga sila si Farrah Potot, 32; Rey Ann Gingoyon, 24 ug Eduardo Macaya Jr., 28, pulos residente sa maong lugar.

Matud ni Lapu-Lapu City Police Office Director, Senior Supt. Armando Radoc, nga ang suspetsado ug mga kauban giingong makabaligya og 30 ngadto na sa 200 gramos nga shabu matag semana.

Dugang ni Radoc nga si Potot maoy tigsuplay og ilegal nga drugas sa Calawisan ug posibleng sa ubang lugar usab sa siyudad.

Nasayran nga dugay na nila’ng gi-monitor ang grupo ni Potot ug gipaabot lang nga malutsan kini og search warrant.

Ang mga suspetsado nasikop sulod sa usa ka panimalay ug wala ra hinuon sila mosukol sa kapolisan.

Si Potot sa iyang bahin miangkon nga tigpamaligya og ilegal nga drugas ug matud pa ang kawad-on maoy nagtukmod kaniya sa paghimo niini.

Apan iyang gihimakak nga iyaha ang mga armas nga nakuha ug kini miasoy nga wa siya masayud kon diin gikan ang maong mga armas.

Si Radoc mitataw nga pinaagi sa ilang sunod-sunod nga operasyon ug pagkasikop sa mga tigpayuhot og ilegal nga drugas sa dakbayan, mokunhod na ang problema sa ilegal nga drugas sa lugar. Subling gihimug-atan nga ang kamandoan gyud ni Mayor Paz Radaza ug Police Regional Office-7 Director, Chief Supt. Tom Bañas, nga sumpuon gyud ang problema sa drugas. - /GMR) (BANAT NEWS)