CEBU, Philippines - Naangol ang lima ka tawo sa panagbangga sa giluwanan nilang sakyanan didto sa dalan national sa Barangay Lugo, Borbon kaniadto’ng Biyernes sa kaadlawon.
Ang mga naangol mao sila si Mildred Lecciones, 22 ug Emma Bolambao Lawan, 48 anyos nga taga dakbayan sa Bogo ug nagsakay sa Chariot nga sakyanan nga may plate number YHP 626 nga gimaneho ni Federico Labrador, 66 anyos nga taga Barangay Babag, dakbayan sa Lapu-Lapu.
Laing mga naangol mao sila si Renato Tuñacao, hingkod ang panuigon, Rico Cabahug, 38, ug Arthur Corbo, 45, nga pulos taga Barangay Ibabao-Estancia, dakbayan sa Mandaue ug pasahero sa multicab nga gimaneho ni Tunacao.
Si PO1 Arnold Catulpos, imbestigador sa traffic section sa Borbon Police Station miingon nga nagdagan paingon sa dakbayan sa Sugbo ang Chariot ug padulong usab sa amihanang bahin sa lalawigan ang multicab.
Matud ni PO1 Catulpos nga paghidangat sa kurbadahong bahin sa maong dapit kalit lang nga nagkasungag ang duha ka sakyanan ug gumikan sa kusog nga impak sa panagbangga misangpot sa pagkaangol sa mga biktima.
Dali nga gidala ang mga biktima ngadto sa Danao District Hospital ug pipila kanila ang gidala usab sa Vicente Sotto Memorial Medical Center sa dakbayan sa Sugbo. (BANAT NEWS)