CEBU, Philippines - Gihimakak ni Cebu City treasurer Diwa Cuevas ang report nga bankrupt na ang kagamhanan sa siyudad sa Sugbo mao nga kinahanglang makabaligya na kini og luna diha sa South Road Property (SRP).
Giklaro ni Cuevas nga ang pagbaligya sa luna sa SRP dili tungod kay wa nay kwarta ang dakbayan kun dili, tungod kay aron mabayran ang utang sa siyudad sa kaugmaran sa SRP.
Ang dakbayan sa Sugbo dunay P3.2 bilyones nga utang sa Japan Bank for International Cooperation (JBIC). Gibutyag ni Cuevas nga ang siyudad magbayad og 9% nga tubo matag tuig sa maong utang. Ang siyudad matag tuig maggahin og dili moubos sa P500 milyones nga budget aron ibayad sa loan sa kaugmaran sa reclamation area.
Gipasabot ni Cuevas nga kung mabayran sa siyudad ang maong utang ang P500 milyones mahipos kini ug magamit ngadto sa uban pang mga galastohan sa siyudad ug serbisyo.
Si Cuevas nga nahinabi sa Banat News kagahapon mibutyag nga ang kagamhanan sa Sugbo karon adunay pundo nga kwarta sa bangko nga P1.7 bilyones. Ang siyudad duna kini P1 bilyon sa general fund nga matud pa ni Cuevas maoy gamiton sa mga galastohan lakip na niini ang pagpanghatag og financial assistance sa senior citizens.
Gawas pa niini, ang siyudad adunay P700 milyones nga trust fund ug duna sad kini P265 milyones nga Special Education Fund (SEF) ug lain pang P626 milyones sa Barangay Fund. (/EIM)(BANAT NEWS)