Papa nga mipatay sa anak kasohan

CEBU, Philippines -  Pasakaan gayud og kasong parricide sa kapulisan ang amahan nga miunay og patay sa iyang kaugalingon nga anak sa nakalabay nga adlaw diha sa Sitio Riverside, Villagonzalo I, Barangay Tejero, Cebu City.

Si Superintendent Romeo Santander ang hepe sa City Intelligence Branch (CIB) sa Cebu City Police Office (CCPO)  miingon nga nakig-alayon na sila karon sa Homicide Section alang sa pormal nga pagpasaka og kaso batok sa maong amahan ug bahala na ang piskaliya nga maoy mohukom niini.

Usa sa mga gipaabot karon sa kapulisan ang sertipikasyon gikan sa Vicente Sotto Memorial Medical Center (VSMMC) Center for Behavioral Science, aron maklaro kung duna ba’y deperensya sa pangisip o tarong ra ba sa panghuna-huna ang maong 29- anyos nga amahan. Samtang sa pamahayag ni SPO1 Ruel Ayuman, ang lead investigator sa maong kaso nga nahinabi sa Banat News kini miingon nga gi-andam na ang kaso ug gipahibalo sila sa VSMMC Center for Behavioral Science nga mahimo madala sa piskalya ang suspek alang sa filing.

Samtang si Cebu City Mayor Michael Rama mimando nga ipadali paghatag ang  financial assistance  alang sa asawa ug anak sa suspek.

Ang pangu sa Department of Social Welfare and Services (DSWS) nga si Ester Concha gimandoan nga tabangan ang pamilya. (/EIM)(BANAT NEWS)