San Roque, Guadalupe ug Pasil ubos sa state of calamity

CEBU, Philippines - Gideklarar na sa konseho sa Sugbo ang mga barangay San Roque, Guadalupe ug Suba nga under state of calamity human nangaigo sa managlahing sunog sa nangaging mga buwan.

Nadeklarar na usab nga under state of calamity sa barangay level ang Barangay San Roque human sa tulo ka sesyon nga wala kini madeklarar.

Si Kapitan Lidiore "Boy" Miranda kahinumduman miingon nga namolitika ang mga konsehal sa wala pag-attend sa ilang sesyon, apan kagahapon nakompleto ang mga konsehal sa maong barangay maong nakadeklarar sila niini.

Si Konsehal Bobby Morados miingon nga wala g’yud sila namolitika tungod kay na-busy ‘sab sila pagtabang sa mga nasunogan.

Matud niya nga wala lang g’yud sila nagkasinabtanay, apan mapasalamaton silang tanan tungod makagamit na sila sa ilang pundo para makatabang sa mga nasunogan nilang ka-barangay. Adunay 278 ka pamilya ang mga nasunogan sa maong barangay sa miaging semana.  Samtang, miingon si Atty. Collin Rossell, pangulo sa City Division for the Welfare of the Urban Poor nga nag-andam na sila sa relocation plan sa Barangay San Roque. Sigon ni Rossell nga ipatuman ang 3-meter easement zone sa nasunogan kay naa sila sa daplin sa Pari-an Creek.

Dugang ni Rossell nga mag-revalidate pa sila kun kinsa ang mga tinud-anay nga house owners sa mga nasunogan aron mahatagan og luna para tukoran sa ilang panimalay.  (BANAT NEWS)