CEBU, Philippines - Gisignit sa City Intelligence Branch (CIB) ang usa ka notadong drug pusher nga nasakpan nga misulay unta og baligya og drugas, didto sa Sitio Lawis Pasil, Cebu City, sa miaging gabii.
Ang dinakpan naila nga si Herculano Cabanes, 55, alyas “Kulis”, nga nagpuyo ra sab sa maong lugar. Sumala pa ni Superintendent Romeo Santander ang hepe sa City Intelligence Branch nga nahinabi sa Banat News nga anaa sa ilang watchlist ang pangalan ni Cabanes, nga naila nga usa sa mga tigpayuhot og drugas sa maong lugar.
Matud pa ni Santander nga human sa ilang nadawat nga impormasyon kabahin sa ilegal nga kalihokan ni Cabanes gilusad nila ang operasyon.
Bayente-singko ka paketeng shabu ug usa ka orange nga plastic container nga dunay sulod nga P14,750 nga gituohang halin sa drugas ang nasakmit. (BANAT NEWS)