CEBU, Philippines - Mga priso sa Bureau of Jail Management and Penology sa dakbayan sa Lapu-Lapu nagparehistro sa gihimong satellite registration sa Commission on Elections sa dakbayan alang sa umaabot nga 2016 national elections.
Si Jail Warden Renante Rubio miingon nga buot niyang makaparehistro ang mga inmates sa sayo-sayo aron di maabtan sa deadline ug maglisod na sila sa pagparehistro.
Tag-napulo ka mga piniriso ang gipagawas sa ilahang selda ug nagpakuha og biometrics aron mahimo silang legal nga mga botante. Ang mga priso nga wala kaabot sa six months residency ang dili makaapil sa pagparehistro. Tumong sa BJMP nga makarehistro og 250 hangtud sa 300 ka mga inmates kagahapon.
"Bisan napriso sila, naa sila'y katungod nga mo-vote and choose kung kinsa ilahang ganahan nga mayor or presidente," dugang ni Rubio.
Matud pa ni Rubio hasol kaniadto ang pagrehistro sa mga priso tungod kay ibiyahe pa sila ug kinahanglan pa og transportasyon ug seguridad.
Adunay 1,100 ka mga inmates ang LCCJ ug magpadayon ang pagpangrehistro ning mosunod nga mga semana. (BANAT NEWS)