‘Giihaw’ sa papa

CEBU, Philippines - Patay ang usa ka 2-anyos nga batang lalaki human nga gigulgol sa iyang amahan nga gikatahong duna’y ‘nervous breakdown’ diha sa ilang balay sa Sitio Riverside, Villagonzalo I, Tejero, Cebu City, kagahapon sa buntag.

Ang amahan naila nga usa ka construction worker, 29- anyos dunay duha ka mga anak, edad singko ug dos anyos, ang naulahi maoy iyang gigulgol og kutsilyo sa liog hangtud nga namatay.

Sa inisyal nga imbestigasyon sa Homicide Section sa Cebu City Police Office (CCPO) gitug-an ni SPO1 Ruel Ayuman nga nahinabi sa Banat News nga kalit nagkagubot ang mga residente sa maong lugar  dihang gigukod sa suspek nga nagbitbit og nagkadugo nga kutsilyo ang iyang 5 -anyos nga anak babaye.

Apan ulahi na nga nasayran nga gipatay na diay niini ang iyang 2- anyos nga kinamanghorang anak ug buot untang isunod ang maguwang apan nakadagan ang bata.

Nasuta sa imbestigasyon nga niadtong tuig 2012,  gibalik- balik og sulod sa Center for Behavioral Science sa Vicente Sotto Memorial Medical Center (VSMMC) ang suspek aron magpatambal.

Ang mga silingan niini mitug-an sa Banat News nga buotan ang suspek ug pinalangga niini ang iyang mga anak.Usa kanila miingon nga yawyawan ang asawa sa suspek ug sige silang maglalis.

Ug nianang buntag nadunggan niya kini nga gipukaw ang bana aron patrabahoon, apan mireklamo kini nga naglain ang lawas.

Migawas sa panimalay ang asawa kay mipalit og sud-an   apan sa iyang pagbalik nahitabo na ang krimen.

Ang pangulo sa Center for Behavioral Science sa Vicente Sotto Memorial Medical Center nga si Dr. Renato Obra mikompirmar nga ilang pasyente ang maong amahan kaniadto.

Nagtuo siya nga nasul-an  sa iyang  sakit ang amahan kay duha  na ka tuig  kining  wa makatumar  sa iyang mga tambal. Ang suspek anaa karon sa ilang kustodiya.

Di babagan ni Obra  ang  kapulisan  pagpasaka og kasong  paricide  sa suspek apan kinahanglan pang sutaon kun wa  pa  kini  sa hustong  pangisip atol sa iyang paghimo  sa krimen.

Dili nila buhian ang suspek kun di kini maulian  sa iyang maayong panghuna-huna aron di na mahimong hulga sa komunidad.  (BANAT NEWS)