CEBU, Philippines - Tulo ka mga lalaki nga gidudahang drug pushers ug gituohang nalambigit usab sa mga pagpanulis ang nadakpan ug nasakmitan og kalibre .357 nga armas diha sa Purok Molave, Barangay Tayud, Lungsod sa Liloan atol sa buy-bust operation sa miaging Martes sa gabii. Ang nadakpan mao sila si Alsio Gabutan Gacanog, 37, taga Sitio Dapdap, Barangay Catarman, Eric Baguio Tagalog, 37, taga Purok Molave, Barangay Tayud ug Ares Manatad, 35, taga dalan Rizal, Barangay Poblacion pulos sa nahisgotang lungsod.
Si SPO1 Bryan Batiquin sa Liloan Police Station miingon nga si Gacanog giila nilang level 2 drug pusher sa nahisgotang dapit ug nadakpan na nila kaniadto sa pagpamaligya gihapon og shabu. Nakuha gikan niya ang 11 ka paketeng shabu, samtang si Tagalog nakuhaan usab og 11 ka paketeng shabu uban sa P200 nga marked money ug laing P400 nga salapi.
Si Manatad nakuhaan og napulo ka paketeng shabu lakip na sa kalibre .357 nga armas nga puno sa mga bala. (BANAT NEWS)