14-anyos ‘pusher’ gibuhian

CEBU, Philippines - Human makompirmar nga 14-anyos gyud ang batang nadakpan niadtong Sabado tungod sa pagpayuhot og illegal drugs ug nasakmitan og balor P6 milyones nga drugas,  gibasura ni Assistant City Prosecutor Alex Gabud ang duha ka kasong illegal possession of shabu ug illegal selling of shabu batok sa bata.

Si Gabud nagkanayon tungod kay gibasura man ang maong kaso, automatic kining i-review sa Department of Justice (DOJ). Kini matud pa nga ang tanang kaso nga ang penalty reclusion perpetua to death, automatikong i- review sa DOJ.

Ubos sa  Section 6 sa Republic Act 9344 or Juvenile Justice and Welfare Act, ang 15- anyos paubos way “criminal liability.”

Matud ni Gabud nga ang bata adto una  ikustodiya sa Local Social Welfare and Development Office (LSWDO) alang sa intervention programs.

Samtang ang 301 gramos nga shabu nga nasakmit kaniya magpabilin una sa Regional Crime Laboratory Office samtang ang kaso i- review pa sa DOJ.

Kun duna nay affirmation sa DOJ ang dismissal sa kaso sa bata, ayha pa moluwat og final order si Gabud aron sunogon o tunawon ang shabu.

Matud sa inahan sa bata, nga nalipay siya pag-ayo nga gibasura ang kaso sa iyang anak. Matud niya kun anha niya ang kustodiya sa bata iya kining bantayan ug paeskuylahon og balik. Ang bata nagtungha pa sa elementarya ug kini grade 5 pa.  Ang bata gi-turn-over sa social worker sa alas 4 sa hapon.

Si Alma Cabus, sa Children in Conflict with the Law (CICL)  miingon nga ang intervention program maglakip sa  pagpaeskuyla sa bata sa Alternative Learning System (ALS) kun ganahan kini. Sa laing bahin, andam proteksiyonan sa kapulisan sa dakbayan sa Sugbo  ang 14-anyos nga ilang dinakpan ug nakuhaan og P6 milyones nga balor sa shabu apan gipabuhian sa piskalya tungod sa iyang edad.

Si Senior Superintendent Noli Romana ang hepe sa kapulisan dinhi sa dakbayan sa Sugbo mibutyag sa Banat News andam silang motagana og police detail sa minor ug sa pamilya niini kun gikinahanglan.

Sumala pa ni Romana nga duna na sila’y gihimo nga imbestigasyon sa pag-ila sa mga kaubanan ug ‘big time drug pusher’ nga agalon sa batan-on apan padayon pa sila sa paghipos pa og dugang mga ebidensiya alang sa himuong “full blown investigation”.

Nabalaka si Romana nga sa nahitabo sa kaso, gamiton pag-ayo sa mga drug lords ang mga bata sa ilang ilegal nga negosyo.

Si Konsehal Gerardo Carillo, tsirman sa Committee on Social Services sa iyang privilege speech miingon mas angay nga pangitaon ug silotan ang nagsugo sa maong bata. (BANAT NEWS)